2012係世界末日？我就未惊过，成班Avengers个个好打过人，由Captain America到Iron Man、Thor、Hulk、Black Widow、Hawkeye及Nick Fury，外星人都畀佢哋打到飞起，使乜怕！不过好打唔代表一切，唔执番个靓样又点会有观众缘，HT新版Captain America就跟足《The Avengers》嘅设定，由制服、髮型到面相都全部执正晒，最重要係终於有「面」见人喇！
咬牙切齿靓仔Look
仲记得HT去年食住《The First Avenger : Captain America》个势，第一次推出1/6 Captain America，不过玩家反应毁誉参半；今次Take Two当然要知耻近乎勇，分外落足心机，净计服装前前後後用咗四个幾月修正再修正。不过最大卖点都係头雕，上次只有头罩Look，白白嘥咗Chris Evans个靓样，今次搵嚟擅长刚阳角色嘅K.A.Kim操刀，从试办所见，呢款咬牙切齿Look比起头罩Look嘅木口木面，有新鲜感得多，而且五官、 皱纹、肤色都相当逼真，头髮亦做足层次感，唔似以往嘅包胶头有欠自然感觉；至於头罩Look亦有所改进，留意头顶嘅A字标誌并非印上去，改用浮雕设计，相 信唔会再出现移位问题。
新Body执正比例
上次Figure被批评又肥又 矮，新版就从善如流，改用全新Body，高咗又Slim咗，又喺手肘加入双铰位，令手臂郁动更灵活。不过有辣有唔辣，新Body嘅胸肌明显缩咗水，唔似上 次咁有爆肌Feel。服装方面，新版变得更薄、更贴身，上半身衫用咗大量布料混合製成，胸位主要係运动网纹布，腰部就用类似Medicom幪面超人嘅弹性 布料，配合两边膊头嘅银色软胶，整体贴身得嚟，又唔会阻碍摆出掟盾、飞跃等大动作。然而，由於成套衫都跟上次一样有多层Layer，会唔会再出现爆线、错 位等问题，就要等到出大货时才能验证。
武器方面，上次难得被赞、金属感涂装幾可乱真嘅电镀胶盾当然有得留低，HT再炮製多个做足旧化嘅新款战损版，再加埋一支外星人激光枪，更加贴近剧情。
*图中为试办款式，与正式推出的版本或有若干分别。
零售价︰HK $1,380、预售价︰HK $1,330
推出日期︰今年第三季
头盔Look讲真变化唔大，抵赞係A字改为浮雕设计，避免移位。
真人Look神似度好高，HT表示初办嘅表情仲兇狠，不过电影公司嫌恶死得滞，惟有再执过、收敛咗。
军Boot係软胶製成，做足褶纹之馀又不失柔软度。
上半身件战衣用咗多层物料製成，中间嘅星星唔再钉喺衫上，改为与Body连接，减低移位机会。
新Body由狼人素体改良而成，比旧版Captain America高咗又瘦咗，但照样有30个关节。
上次嘅Captain America引嚟玩家唔少批评，今次全面执番靓，总算有个交代啦！
今集队长冇开枪，所以冇跟手鎗、机关鎗，不过改送戏中抢番嚟嘅外星人激光枪。
今次有齐「令面」电镀盾及「哑面」战损盾，後者做足旧化涂装。
