我的12吋世界

雖然《M.I.B.》已經係15年前嘅事，不過嚟到第三集，Agent J及Agent K依然有型有款孖咇出場，仲會由紐約打到嚟香港？唔係啩，我連片尾嘅製作人員及單位名單都睇埋，都唔覺有呢一幕喎……查實係本地薑Enterbay又再出 手，攞齊License，將Agent J及Agent K，以至武器連Agent F都變成1/6版本，部署進駐粉絲屋企、清除外星「蟲患」。
E記今年夏天動作多多，除咗事先張揚會出Rambo、蝙蝠俠及小丑等多個1/4 HD Masterpiece Project，1/6 Real Masterpiece亦同樣熱鬧，李小龍、Kobe Bryant已經排緊隊，打頭炮就有黑超特警組嘅Agent J及Agent K，而且一改以往慢半拍作風，Figure與電影同步登場，等大家睇完戲即刻買到心頭好。
韋哥首度授權
香港Figure質素可謂超晒班，頭雕神似度更加超越蠟像級數，令好多荷里活巨星都願意批出肖像權，飾演Agent J嘅Will Smith就是其中之一；原來「韋哥」以往從未將肖像權批畀玩具商，今次破天荒，除咗有授權費落袋外，相信由SCUDERIA操刀、大師Y.J.Park 監修嘅精細頭雕畀到佢好大信心，闊額、大鼻、厚唇及二撇雞等特徵都拿捏得到，膚色塗裝亦見均勻，唔會有過黑嘅問題出現。至於「Agnet K」Tommy Lee Jones就更加傳神，唔只四方面忠實呈現，其蒼白膚色及深邃皺紋，更顯蒼桑，配合微微緊閉嘅雙唇，Human-being到爆！
收腰老西夠挺身
話明「Men In Black」，黑西裝自然係另一焦點，今次由韓國著名人偶服裝設計公司ADDBLUE參考電影設定製成，筆挺得嚟又收腰，仲有絲質光澤，套上素體後有型、 貼身，同真西裝冇咩分別。鑑於Tommy Lee Jones身形較橫，廠商特別加闊咗白恤衫領口位，打起呔嚟唔會過於繃緊，夠細心。美中不足係電影中本名「Upside Down」嘅西裝，本身隱藏魔術貼，即使演員倒吊，西裝、領呔都唔會移位，若果E記連呢點都跟埋，就攞足100分喇！
至盞鬼Agent F

 根據慣例，E記差不多每次有大Project，都會開發一個全新Body，今次MIB都唔例外，新款嘅RM-6素體就有40個關節，用埋PVC軟膠物料覆 蓋胸部位置，將胸部周圍嘅關節隱藏起來，同時令手臂線條變得更美觀。另一方面，由第一集到第三集，Agnet J與Agnet K都會手持好多古怪武器，但係Will Smith怕教壞細路，因此堅持佢嘅Boxset唔可以跟武器，所以Deatomizer、三管等離子槍、袖珍手槍及特工手槍全部喺晒Tommy Lee Jones嗰盒，至於Agent J嘅配件就有時空穿梭器、失憶棒及片尾攸關重要嘅ArcNet防護罩，不過至盞鬼反而係冇喺第三集出場嘅Agent F八哥狗法蘭，連佢副黑超都除得到，變相有兩個Look。

零售價︰$1,380/個（門市於6月21日起接受預訂）

派貨日期︰6月中

優　　惠︰朗豪坊及太古城UA戲院的精品概念店「這兒」現與Enterbay合作，即日至6月21日期間預訂，可享85折優惠及送精美贈品。

查詢︰2332 3615（Enterbay）

 

 

Agent J及Agnet K都採用全新嘅RM-6素體，關節數目多達40個，至於高度亦跟足真人比例，Tommy Lee Jones矮過Will Smith少少。

 

由右至左，Will Smith Boxset跟時空穿梭器、失憶棒及ArcNet裝置，配件分量比較少。