若果外星人入侵，提出以籃球1 on 1決定地球命運，邊位球星最夠資格孭飛保護地球？唔使問阿貴，梗係Michael
Jordan啦！波神雖然已經退役10年，但係神技、鬥心，加上數之不盡嘅Money
Ball，大家依然歷歷在目，當正佢神咁拜。好彩地球未有外在威脅，波神今年又50大壽，全球各界都要賀一賀佢，本地薑Enterbay就炮製出波神
1/6 Figure，推出首日已炒高至$5,000，不過各位球迷唔使慌，因為由即日至2月3日都仲有得賣，但係每日配額不同，仲唔快快排隊入貨！
香港嘅Action Figure唔只贏質素，而且膽
識過人，EB去年就破天荒推出NBA Figure，頭炮Kobe
Bryant，口碑、票房雙贏，勢頭咁好，點可以停？最近就推出全球首個獲官方授權嘅1/6 MJ
Figure，神級頭雕配像真度高嘅波衫、波鞋，全球限量2,500套，原價$2,188，首日開售已經炒到$5,000高位，依然大把人搶，正如HK-
Kicks.com波鞋收藏家Horace話齋︰「波神Figure，幾貴都要買返屋企供奉啦！」
籌備五年終圓心願
那些年，籃球係好熱血嘅，手揸一本《Slam Dunk》、腳踏一對Air Jordan，眼望MJ跟Magic Johnson及Reggie
Miller嘅大鬥法，依家諗番都熱血沸騰。身為80後、EB老闆Bill爺都係飲MJ嘅奶水大，為波神出1/6
Figure係佢多年心願，Bill爺解畫︰「整個構思源於2007年，最初接觸NBA，經佢哋轉介先知道MJ嘅玩具版權原來歸Upper Deck所有，之後我同嗰邊不斷電郵聯絡，但係屢次碰壁，直到2010年，我將一啲Figure作品畀佢哋睇，加埋詳細嘅計劃書，終於感動到佢哋批出版權，當然背後版權費係天文數字啦！」
手臂肌肉見線條美
就同電影《一代宗師》一樣，雖然幾經波折，又要人等到頸都長，不過見過呢款1/6
MJ嘅真身後，粉絲嘅等待絕對值得。經過李小龍、T-800嘅磨練，頭雕師Scuderia嘅功力更上一層樓，由佢主理嘅MJ頭雕，神似度絕對真人咁款，
微微向上尖嘅光頭、筆挺有肉嘅大鼻子、上窄下寬嘅耳殼，以至打波時微微凸起嘅青筋，種種特徵都忠實還原，假如表情唔係咁木獨、改為伸脷嘅話，擺甫士一定更
加入型入格。Body就採用新開發嘅NBA-MJ素體，全身有30個關節，13"高度就參考MJ實際身高設定，比一般12"
Figure更有氣勢，手臂肌肉都跟足真人，有晒線條美，唯一要鬧係小腿過於光滑、欠質感，唔夠手臂咁Human-being。
45號做頭炮
MJ總共打咗15個球季，無論造型、波衫以至AJ都歷經多代變化，或者基於商業考量，以及為咗貫徹「I'm Back！」嘅主題，今次Figure並非最深入民心嘅23號造型，反而揀咗1995年3月19日第一次作客復出個款，所以身穿芝加哥公牛嘅45號紅色波衫，腳踏當時嘅黑白紅AJⅩ，其他配件包括10隻造型手掌、一個Spalding磁石波、一個印咗公牛Logo及支架可隨意扭動嘅地台等，至於護肘、護腕及護膝都按足比例製作，穿戴位置跟足MJ習慣，又可以將部份關節位遮蓋起嚟，一舉兩得！
Bill爺爆料
S：The Sun
B：Bill爺
S：今次MJ率先用45號造型亮相，日後又有邊啲造型？幾時出場呢？
B：我哋暫定會推出五個系列，每個系列跟一個頭雕及三對AJ，仲會先出限量版，之後有普通版。白色45號只會喺海外發售，而最受注目嘅23號配AJⅡ、AJⅩ及AJ ⅩⅠ暫定三、四月出。另外，射波樣嘅SeriesⅡ會喺動漫節推出，日後仲有伸脷Look、奧運版甚至全明星版，務求重現MJ生涯中每個亮點。
S：除咗MJ，其他NBA球星嘅開發進度又如何？
B：Lebron James暫定四月派貨，其後仲有Blake Griffin、Derrick Rose及林書豪等。為咗重現公牛王朝鐵三角，Scottie Pippen及Dennis Rodman嘅版權亦在洽談當中，成數頗高，希望可以盡快同大家見面啦！
珍藏展必睇
為隆重其事，EB聯同HK-Kicks.com由即日至二月三日期間，喺尖沙咀活方商場舉行大型MJ珍藏展，除咗展示一系列MJ Figure，仲有大量相關嘅籃球珍品供球迷朝聖。
AJ復刻陸續來
賀壽大禮唔只Figure一招，Nike早已事先張揚，今年會復刻多款AJ，今期就有AJ Ⅴ及ⅩⅢ，前者採用經典嘅白×黑原色，即係連《Slam
Dunk》流川楓都着嗰款囉；後者係黑×紅版本，踭位以至鞋底嘅圓形雷射標誌都忠實重現，可惜鞋面上嘅白色圓點棄用原來嘅3M，還原度唔及AJ Ⅴ。
NBA-MJ素體高13"，肌肉線條參考真人製成，夠晒台型。
唔只頭雕神似，加埋可動性高，可以擺出多款動感甫士，忠實重現波神當年球壇英姿。
今次限量版附送熱身Track Suit，啪鈕褲真係有鈕，使唔使認真成咁呀！
波衫薄身兼有彈性，剪裁及氣孔紋理都跟足落場版波衫。
波褲上嘅公牛標誌採用絲印技術，印正中間冇移錯位，抵讚！
跟上次Kobe Bryant一樣，造埋Spalding磁石波，轉到特定位置就可以吸實磁石手。
黑白紅公牛配色嘅AJⅩ係今次限量版獨有，仔細到鞋帶、鞋底都一絲不苟。
包裝盒有波神肖像同親筆簽名，好鬼精美，但部分網友指包裝盒有爛，取貨時要檢查清楚。
波鞋收藏家Horace（HK-Kicks.com）：「呢款MJ無論頭雕、肌肉都做得相當仔細，而且望實物比官圖仲似，就算我冇玩開Figure，都想即刻入手！」
韓國球迷Heo Won Jun：「我細細個就鍾意MJ，頭先有人出$3,000我都唔賣，佢係我嘅非賣品，要帶返屋企慢慢欣賞。」
23號戰衣配紅黑AJⅩⅠ最快喺三月同大家見面，勢必又掀搶購潮。
AJⅠ至ⅩⅡ都會按1/6比例開發，圖中AJⅩⅠ嘅漆皮位造到真鞋咁款。
Bill爺爆料話Pippen及Rodman都有機會出Figure，籃球迷唔使旨意有錢剩。
AJⅠ至ⅩⅣ全部列陣，每對都附有背景說明，必睇！
除咗今次嘅1/6 Action Figure，同場仲展出唔少陳年MJ Figure，從中見證Figure製作技術嘅急速成長。
