HT×STARWARS歷年最真1/6天行者
但凡三字頭以上嘅男士，十個有九個都係飲《星戰》嘅奶水大，激光劍、激光槍加3.75吋公仔全部儲落一大堆，偏偏12吋公仔來來去去都係SideShow嘅盔甲人，點解唔儲埋人類角色？因為面相雕得唔似囉！等咗咁耐，Hot Toys終於為大家圓夢，借助韓籍頭雕師嘅鬼斧神工，33年前嘅Bespin Luke Skywalker，終於以超像真1/6 Action Figure姿態重現人間，配合斷手造型及巨型Cloud City地台，加埋個Dark Vader就可重拍1/6嘅《帝國反擊戰》！
雖然《星戰》被譽為科幻電影經典，但咁多年嚟都係紅戲唔紅人，真正能夠彈出嘅演員，就只有演配角Han Solo嘅Harrison Ford一個，相反主角Mark Hamill依家已經變成大肥佬，冇咩人記得！然而，首三部曲真正燴炙人口嘅，始終係阿Mark飾演嘅Luke Skywalker，HT老闆Howard亦有同感︰「Luke有正義感又有義氣，面對困難都唔放棄，同我做人方針好似。我記得我五歲時第一個3.75吋玩具，正正係Cloud City造型嘅阿Luke，將佢化成12吋Figure，係我多年嚟嘅夢想！」
SideShow開綠燈 十周年圓夢
夢想歸夢想，《星戰》玩具版權始終喺孩之寶手上，就算你有鬼斧神工嘅頭雕技術都英雄冇用武之地，何解HT可以有志者事竟成，Howard解畫︰「我哋同 SideShow一直有合作，當年佢哋喺孩之寶批到12吋Figure製作版權，我哋提供技術協助之餘，亦提過希望獨立負責一個《星戰》Project。 適逢去年係HT十周年，我哋舊事重提，可能多年嚟大家建立咗良好嘅互信關係，今次佢哋一口答應，終於令我夢想成真。」Howard仲話今後HT每年只會開 發一至兩款《星戰》角色，選角亦會以SideShow短期內唔會推出作大前提，加上納入DX系列後定價較高，完全粉絲方向，避免跟友好夥伴有直接競爭。
兩款頭雕 神情各異
SideShow近年來都主攻白兵、Boba Fett等盔甲人，加上Howard本身心願，HT星戰頭炮選中Luke Skywalker實屬情理之內，不過正傳故事有 三集，何解偏偏選中《帝國反擊戰》？Howard話：「呢一集阿Luke着住軍服，加上又受傷又斷手，創作空間比其餘兩集大。」一如其他DX系列，DX Skywalker提供正常及戰損版兩款頭雕，兩者都內置咗P.E.R.S.轉眼系統，並由韓籍大師Kojun親自操刀。
就試辦所見，輪廓、五官異常逼真，而且神情各異，例如正常版帶點天真戇直，戰損版就流露驚惶面色，入晒戲！最難得係後者除咗面部有傷痕，連帶頭髮都比較貼服，同片尾造型一模一樣，相信連George Lucas睇過都會激讚。
大陣仗 Cloud City地台驚現
其他部分亦見心思，例如戰損版嘅上衣除咗有破口，仲用乾畫筆掃出輕微嘅舊化感覺，配合仿麖皮Boot、腰帶、激光槍及激光劍等一系列配件， 同真戲服比幾可亂真。要讚仲有戰損版嘅斷手效果，見到骨髓之餘，仲有裝咗Utah Arm前嘅臨時義肢以供替換。另外，為咗重現Skywalker逃走一幕，隨盒附送巨型Cloud City地台，內有四盞LED燈，支架仲可以90°左右轉動，留意地台附帶螺絲，不過掛起嚟就要自己動手。售價方面，兩個造型賣二千頭尚算合理，VIP會 員仲可以加錢換購「Luke × Dark Vader」頭雕一個，羨慕死人！
HT DX Bespin Luke Skywalker
零售價︰$2,180
預訂價︰$2,150
VIP會員預訂價︰$2,280
發售日期︰2012年第二季
（圖中為試辦款式，與正式推出的版本或有少許分別。）
HT DX Bespin Luke Skywalker
面相超像真，若非頭髮太膠，相信效果仲好。另外雙眼內置轉眼系統，瞳孔更加入放射線，望落分外有神。
巨型Cloud City地台足足有二十六吋高，頂部係LED燈，中間係鐵柱，保證夠力承托Figure重量。
